برنامج لدجاج التسمين الابيض 2013 م ياسر حنيدق

بسم الله الرحمن الرحيم

ده البرنامج لدجاج التسمين الابيض اللى انا شغال بيه

اولا – التغذيه

بنبدأ بعلف يسمى بادئ وده بيكون 23 % بروتين

والكتكوت بياكل تقريبا حوالى 500-700 جرام علف

بياكلهم فى 15 يوم او 20 يوم والعلف ده بيكون زى

ما قلت 23 % بروتين و 3050 ك ك ( طاقه )

نصيحه بقى فى بداية وضع العلف نحط فى طبق التحضين شويه صغيرين يعنى لما يخلص نحط وهكذا

بعد كده النامى بيكون 21 % بروتين طيب

فى ناس ممكن تكون حصل ظروف اثناء الدوره والنمو مش اللى هو ممكن نزود فترة البادى شويه علشان كده قلنا 500-700

اما النامى فبيكون 21 % بروتين وطاقه 3150 كك

وتقريبا بياكل من 1.75- 2 ك

وبعد كده بناكل علف ناهى وده بيكون بروتين 18 % او 19 % وطاقه تقريبا 3200 ك ك وطبعا هنكمل لحد اخر الدوره لحد ما نوصل 3.5 او 4 ك

م ياسر حنيدق
01008385995
ملاحظات نخلى بالنا منها

1- الاطباق فى التحضين ال 5000 الالف هيخدو 80 طبق علف انا عارف انهم زياده بس الزياده افضل

ولما يكبرو هيخدو 100- 120 علافه بلاستيك او صاج 6 ك ( يعنى بتشيل 6 كيلو علف )

2- كل ما الفرخ يكبر نرفع العلافه من على الارض وهكذا

3- نخلى بالنا مفيش علف يقع على الارض

4- نحط العلف على مرتين او تلاته هى تعب شويه بس مش مشكله

5- كل شويه نهز العلف

6- وطبعا فى الصيف بنرفع العلافات من 9 مثلا الى 5 عصرا او لما الجو يبقى تراوه

7- فراخ سرده او او اى فرخ مصاب فى اى مشكله اعدمه وريح نفسك لان ده وباااااء لباقى العنبر

8- بتحط سطر علافات وسطر سقايات وهكذا

9- ممكن تستقبل الكتاكيت على علف اول 3 ايام وترش عليه سمسم مع حبة بركه

10- لازم نحسب استهلاك العلف كل يوم علشان نعرف حالة القطيع يعنى العلف فى زياده يبقى ماشيين كويس ثبت او اقل او الزياده قليله يبقى عندنا مشكله ولازم ناخد بالنا من لون العلف وريحته

11- لما اجى اسكن فى التحضين هيبقى كل 50 ك فى متر وكل لما العدد تحس انه زحمه اوسع لحد ما اوصل المتر 10 فرخه

ثانيا - الحراره

اول 3 ايام 34 وهنزل بعد كده لحد ما نوصل فى اليوم السابع الى 32 لاكن عاوز اقول ان دى مش قاعده يعنى ايه يعنى ممكن اهم حاجه يكون الكتكوت منتشر فى العنبر وبياكل ويشرب ممكن هذه الدرجات تزيد او تنقص درجة

الاسبوع الثانى هنبدا ب 32 وهنتهى على 30 ( من عمر 7 حتى 14 )

الاسبوع الثالث 30 وهننتهى 28 ( من عمر 15 حنى 21 )

الاسبوع الرابع من 28 وهننتهى على 26 ( من عمر 22 حتى 29 )

بعد كده نمشيها 25 او 26 او 27

اهم شئ الفرخ ميكنشى مجهد او بيلهث او لامم على بعضه

م ياسر حنيدق
01008385995

ثالثا - الادويه والتحصينات

اول 8 سعات هنستقبل على محلول معالجة الجفاف جرام للتر +10 جرام سكر للتر + 0.5 اد3ه

اول ثلاث ايام نستقبل على انروفلوكساسين + كولستين

طيب الجرعه انا اول سقوه بحط 2 سم انروفلوكساسين ( لا يؤثر على الكلى ) وبعد ربع جرام كولستين

وبعد كده بمشيها سم انرو + ربع كولستين

العمليه مظبوطه والنافق تمام كفايه 3 ايام فى نافق كمل يوم او يومين

اليوم الخامس والسادس هنزل ب اد3ه +املاح معدنيه + ه سيلينوم كل حاجه مثلا سقوه او 8 سعات

قبل التحصينه اللى هى هتكون اليوم السابع بنزل برافع مناعه زى الامينولين

اليوم السابع هنزل بالتحصينه وياريت نحصن بدرى على الساعه 7 نكون محصنين وخلى بالكم كل المشاكل اللى بتحصل سببها التحصين يعنى تعطش جامد الكتاكيت تتجنن على الماء تدخل تغرق نفسها تيار هواء على طول تجيلك الطشمه فياريت نخلى بالنا

بعد التحصينه ممكن انزل ب ه سيلينوم وبعدها ممكن رافع مناعه اليوم التاسع والعاشر هننزل بسقوة سموم ضرورى وبعدها اى حاجه تنفسى لو فى انروفلوكساسين فاضل عندك من التحضين يبقى انزل بيه لمدة 3 ايام مع السموم بالتبادل كل واحد لوحده فى الماء يعنى محدش يقلى مع بعض

لو لاحظنا اسهال بنى ذو رائحه كريه بكثره ممكن ننزل بجرعة كولسترديا ( سامع واحد بيقول ممكن ميكنشى كولسترديا اى ياعم صح كلامك ممكن يكون اضطرابات معويه عادى يعنى فناخد بالنا قوووى )

نسيت صح فى حقن انفلونزا ونيوكسل على اليوم العاشر اللى هى اسمها الثنائى طيب نخلى بالنا من الموضوع اللى هقول عليه

معظم الناس اللى بيحقنوا معندهمش ضمير ازاى طيب يا هندسه هقلك انت اللى تشغله متسبلوش العنبر كده وخلاص بيعملو ايه يروح المعلم مجمع العنبر كله فى باكيتين والجو بيكون حر ويفضل يحقن فى 3 سعات الكتكوت اللى بيكون فى الحجازه بيكون عرقان يتحقن ويطلع فى الوسع ياخد برد علطول ونلاحظ دايما ان الطشمه غالبا بتيجى من كده

طيب نعمل ايه يا هندسه اقلك تقسم العنبر لاجزاء مثلا عندك 5000 الالف تخلى 4000 فى حجازه لوحدهم طبيعى يعنى مفيش زحمه ولا اى تاثير وحاجزه فى 500 او الف بكتييير وحجازه يرمى فيها اللى يتحقن كده انسى الطشمه

نرجع بقى للبرنامج

اليوم ال 14

قبله هندى رافع مناعه لمدة 8 سعات الصبح بدرى نحصن الجامبورو ( تحصينه غلسه وشديده ) دايما تعمل مشاكل

واحد هيقلى بنحصن ازاى هقله فى معادله وهقلهالك

لحساب كمية الماء

العدد * العمر * 2 ازاى مش فاهم

عندى 5000 احصنهم ازاى

5 * 14 * 2 = 140 لتر ماء

طيب كل الف ك ليهم امبول وربع من التحصين

طبعا قبل اى تحصينه بنعطش

بعد كده

اليوم 15 و 16 و 17

سقوه مضاد للكولسترديا

وسقوة مصاد للكوكسديا

وسقوة سموم
لو فى اى مشاكل تنفسيه هيبقى فى جرعة مضاد حيوى تنفسى

اليوم ال 18 قبله ب 8 سعات رافع مناعه وبعدين احصن الكوون

5*18*2= 180 لتر ماء وعطش قبلها ساعتين

وبعدها رافع مناعه وبعدين
بعد كده هنحصن كولون اليوم 28 و 38

بعد كده هنمشى كل اسبوع جرعة سموم + جرعة تنفسى +معوى

كل 10 ايام مضاد كولسترديا وكوكسديا

كل 12 يوم غسيل كلوى ومنشط كبد

المهم اننا نخلى بالنا بعد اليوم ال30 من الكوكسديا والكولسترديا علشان الفرخ ما يسيفش بلغة التجار يعنى يخف

فى بعض الادويه اللى جربتها واثبتت كفاءه زى

السيبرو – كولى سبرين – تراى سين – فوسباك – دوكسى – انرو – تيلوزين ده بلنسبه للمضادات الحيويه

دوكاموكس – اموكسيد الاتنين 80 % مضاد للكولسترديا

داينوكوكس – نيو كوكس – تولتراسول – دلتا زوريل مضاد للكوكسديا

Btl - سينرتوكس من مصدر موثوق مضادات السموم

رينيل غسيل كلوى

هريبانول غسيل ومنشط كبد

التحصينات ( انتر فيت او ISO )

ملحوظه

كل المعلومات السابقه من واقع شغلى يعنى ممكن اى حد يختلف برنامجه عن هذا البرنامج وممكن ظروف اى دوره تحتم عليك انك تغير البرنامج خاااالص يعنى البرنامج ده مش قاعده لاكن ممكن يكون شبه ثابت

واولا واخيرا التوفيق من عند الله

الله الموفق

م ياسر حنيدق
01008385995
https://www.facebook.com/mohands.vet?ref=tn_tnmn